O Concello de Riveira anuncia no BOP a convocatoria de subvencións para a promoción de actividades deportivas no exercicio 2015. Esta liña de achegas están dirixidas a promover actividades dos clubs deportivos existentes no municipio, de acordo cos principios de obxectividade, concorrencia competitiva e publicidade.
Poderá ser subvencionada, ata un máximo do 70% do gasto efectuado e acreditado, co límite de 8.000 euros, a organización de actividades deportivas desenvoltas por entidades deportivas de carácter afeccionado, así como a participación en competicións deportivas sexan ou non federadas, e a organización de eventos deportivos.
As actividades subvencionadas deberán terse desenvolvido entre o 1 de novembro de 2014 e o 30 de outubro de 2015.
Os conceptos subvencionables serán os seguintes:
o Arbitraxes
o Mutualidades
o Gastos federativos por inscricións nas ligas ou campionatos.
o Desprazamentos (viaxes, aloxamento e manutención) sempre e cando veñan acompañados na memoria da actividade dun calendario de competicións que xustifique os mesmos.
o Organización de competicións deportivas abertas ao público en xeral.
o Monitorado.
o Material deportivo non inventariable.
Non se subvencionarán investimentos reais.
O Concello de Riveira dispón dunha contía de 73.748 euros para destinar a esta convocatoria.
